Nizami rayonunda - “Koroğlu” metro stansiyasının ətrafında yeni multimodal nəqliyyat mübadilə mərkəzi (NMM) öz fəaliyyətinə başlayıb. Bu haqda bu gün, 30 iyul tarixində Bakuplus.az Azərbaycan Yerüstü Nəqliyyat Agentliyinə (AYNA) istinadən məlumat verir.
NMM-in sayəsində sərnişinlərin avtobus, dəmir yolu və metro arasında rahat keçidi təmin ediləcək, nəqliyyatın xaotik hərəkətinin qarşısı alınacaq, habelə avtobusların boş yürüş məsafəsi azaldılmaqla əsas magistrala çıxışı asanlaşacaq.
Ərazidə, həmçinin əhalinin nəqliyyat vasitələrini park edərək ictimai nəqliyyatdan istifadəsi üçün şərait yaradılıb.
Bu gündən buradan hərəkət edən avtobuslar birbaşa Xəlil Rza Ulutürk küçəsindən Ziya Bünyadov prospekti ilə kəsişmədə yerləşən yolötürücünün üstündən geriyə dönərək, Heydər Əliyev prospekti, Qara Qarayev və Zabrat yoluna istiqamətlənir. Nəticədə avtobusların yürüş məsafəsi 900 m-ə kimi azalıb.
Layihənin icrası nəticəsində 300-dən çox avtobusun Heydər Əliyev prospektinə daxil olmasının qarşısı alınaraq, ərazidə tıxacların azalmasına gətirib çıxaracaq.
