“Nokia” rəqəmsal şirkəti Mərkəzi Asiyada biznesini idarə etmək üçün Bakıda regional nümayəndəlik yaradıb. Bu haqda 14 mart tarixində Prezident İlham Əliyevin Berlində Almaniyanın aparıcı şirkətlərinin rəhbərləri ilə görüşü zamanı “Nokia” şirkətinin təmsilçisi Olaf Şults bildirib.
Olaf Şults transformasiya prosesində rəqəmsal savadlılığın artırılmasının vacibliyini vurğulayıb və bu sahədə ölkənin İnnovasiya və Rəqəmsal İnkişaf Agentliyi ilə əməkdaşlıq etdiklərini qeyd edib.
“Təhsil proqramı üçün pul vəsaitləri ayırmışıq. Növbəti ay Bakıda laboratoriya və şəbəkəni istismara verəcəyik. Biz Azərbaycanı təkcə məhsul verdiyimiz bazar kimi qəbul etmirik. Bu gün bu işləri görürük və bundan fərəhlənirik. Bununla belə, ölkədə rəqəmsallaşdırma prosesinin bir hissəsi olmaq istəyirik”, – deyə Olaf Şults vurğulayıb.
