Bakıda yeni parklar salınır. Bu haqda bu gün, 13 iyun tarixində Bakuplus.az APA-ya istinadən xəbər verir.
Bakı Şəhər İcra Hakimiyyətindən verilən məlumata görə, Bakı şəhərinin ərazisində hazırda 10 meqaparkın salınması işləri həyata keçirilir, bəzi parkların ərazisi artırılır.
Paytaxtda aparılan geniş tikinti-quruculuq işləri çərçivəsində bir çox yerlərdə istismar müddəti bitmiş, qəzalı bina və tikililərin əvəzinə yeni bina və obyektlər deyil, məhz parklar salınır.
Hazırda Xətai rayonunda yerləşən “Sevgi” parkının genişləndirilməsi ilə bağlı işlər görülür. Həmçinin Mərkəzi parkın 3-cü hissəsində genişləndirmə-abadlıq işləri aparılır, Nərimanov rayonunda Ceyhun Hacıbəyli, Nəsib bəy Yusifbəyli, Vaqif küçələrinin kəsişməsində, keçmiş anten sahəsinin ərazisində yeni meqapark salınır, Nərimanov parkının əsaslı təmiri və yenidən qurulması aparılır. Eyni zamanda Xaqani bağında təmir-yenidənqurma işlərinə başlanılıb. 28 May, Mehdi Mehdizadə, Elman Ovçuyev və Hüseyn Rəsulbəyov küçələrinin kəsişməsində 12 ha sahədə yeni park salınır.
Bundan əlavə, Dəmiryol Vağzalının qarşısındakı meydanda təmir-yenidənqurma işlərinin aparılması üçün layihə-smeta sənədləri hazırlanıb və işlərə başlanacaq.
