Sabunçu rayonunda 9 ildir ki, qəbiristanlıqda tənha kişi yaşayır. Bu haqda 6 oktyabr tarixində RealTV məlumat verib.
Məştağa qəsəbəsi, Heybət Heybətov küçəsində yerləşən təzə qəbiristanlıqda 35 yaşlı İlham Ağayev diri ikən buranı özünə mənzil seçib.
O, bir-birinə sıx yerləşən məzarların arasındakı daxmada yaşayır. Yarıqaranlıq otaq uçuq, sökük, qapısız, toz basmış, hörümçək toruna bürünmüş vəziyyətdədir. İlhamın dediyinə görə, bir zamanlar bura məscid olub. Indi isə xarabalığa bənzəyən yer nə dua üçün, nə də yaşamaq üçün uyğun deyil.
İlham Ağayev 8 saylı sanatoriya tipli internat məktəbində böyüyüb. İnternat məktəbini 9-cu sinifdən tərk edib və bir müddət kirayələrdə yaşayıb. Fəhləliklə məşğul olduğundan kirayəhaqqını ödəyə bilməyib və hazırda yaşadığı qəbiristanlığa gəlib.
“Bütün günüm qəbiristanlıqda keçir. Burada əzizlərini dəfn edən hər kəs artıq məni tanıyır. Necə biri olduğumdan xəbərdardırlar. Maddi baxımdan da köməkliklərini əsirgəmirlər. Lakin daha bu şəraitdə yaşamaqdan bezmişəm. Gecələr buranın vahiməsi, yayda istisi, qışda isə yatdığım yerin su olması mənim səhhətimə təsirsiz ötüşməyib. Bütün bu səbəblərdən məni evsizlər üçün nəzərdə tutulan sosial sığınacağa yerləşdirməyi istəyirəm”, - İlham Ağayev bildirib.
Faktla bağlı Əmək və Əhalinin Sosial Müdafiəsi Nazirliyindən bildirilib ki, Sosial Xidmətlər Agentliyinin mütəxəssiləri tərəfindən İlham Ağayevin qiymətləndirilməsi aparılacaq və qiymətləndirmənin nəticəsinə uyğun olaraq, agentliyin müvafiq müəssisəsinə yerləşdirilməsi təmin ediləcək.
