Atası və ailəsi tərəfindən qaçırılan qızın məhkəməsi davam edir. Bu haqda bu gün, 5 may tarixində Bakuplus.az Oxu.az-a istinadən xəbər verir.
22 yaşlı Elvina Əhmədovanın həyat yoldaşı ilə boşanma məhkəməsi hazırda davam edir. O, uşağına 2 həftədir ki, qovuşduğunu bildirir.
“Qarşı tərəfdən hələ də təzyiq və təhdidlər gəlir. Uşaq bərbad durumdadır. Xiffət və qorxudan psixoloji durumu pozulub. Elə arıqlayıb ki, onu görəndə tanıya bilmədim. Yanımdan aralanmır. “Ana, heç yerə getmə”, - deyə təkrarlayır”.
E.Əhmədova deyir ki, həyat yoldaşı ona təzyiq edir və alimentdən imtina etməsini istəyir.
“Deyir: “Alimentdən imtina et, mən də boşanma ərizəsinə imza atım. Yoxsa üç ay uzanacaq”. Dedim: “Alimentdən imtina etsəm, şənbə-bazar uşağın səndə qalmasından da sən imtina edəcəksən”. O da dedi: “Mənim üçün problem yoxdur, amma alimentdən əl çək”, - deyə qız əlavə edib.
O, məsələnin bu həddə çatmasında birbaşa atasının günahı olduğunu deyir. Hazırda istəyi təhlükəsiz və uşağı ilə birlikdə həyatını davam etdirməkdir.
24 fevral tarixində, paytaxtın Binəqədi rayonunda gənc qız zorla qaçırılmışdır.
