Son illərdə Bakıda sərçələrin sayı azalıb. Bu barədə biologiya elmləri doktoru Tahir Kərimova istinadən Media.az məlumat verib.
Kərimov qeyd edib ki, bu barədə Azərbaycan Milli Elmlər Akademiyasına və Ekologiya və Təbii Sərvətlər Nazirliyinə şəxsən yazılı məlumat verib.
Məlumata görə, sərçələr ən çox insanların yanında yaşayırlar. Son vaxtlara qədər paytaxtımızın quş faunasının əsasını sərçələr təşkil edirdi. Lakin son illər paytaxtda aparılan tikinti işləri sərçələrin həyat tərzinə ciddi təsir edib.
Birincisi, Bakıda kol azdır. Yeni ağac növlərinin əkilməsinə üstünlük verilir. Sərçələr isə, əsasən, kollarda yuva qurur.
İkincisi, süni çəmənliklərin sayının artması sərçələrin də həyat tərzinə təsir göstərmişdir. Sərçələr daha çox qazon otlarının toxumları ilə qidalanır. Əsl ot tez-tez biçildiyindən, süni ot örtüyü yaradıldığından sərçələrin qida bazası azalıb.
Üçüncüsü, şəhərdə qarğaların sayının artması sərçələrin yoxa çıxmasına da təsir edib. Qarğa həm cücələri, həm də sərçə yumurtalarını yeyir. Bu səbəbdən sərçələr daha təhlükəsiz yerlərə köç edirlər.
Dördüncüsü, sərçələr, əsasən, evlərin damlarında və ya onların çatlarında yuva salırdılar. Son illər binaların dam örtüyünün dəyişdirilməsi və üzlənməsi sərçələri ənənəvi məskənlərindən məhrum edib.
Bundan əlavə, alimin sözlərinə görə, son vaxtlar şəhərdə ağcaqanadların sayı azalıb. Bu da sərçələrin qida tapmaqda ciddi problem yaşamasına səbəb olub.
“Sərçələr köçəri quşlar deyil, onlar sadəcə yaşayış yerini dəyişirlər. Yəni bu köçdə təhlükəli heç nə yoxdur. Bunun Bakının fauna və florasına elə də güclü təsiri olmayacaq”, - deyə elmlər doktoru bildirib.
