Paytaxtın Binəqədi və Sabunçu rayonlarında yerləşən su ovdanları antisanitar vəziyyətdədir. Bu haqda bu gün, 11 noyabr tarixində Bakuplus.az ATV-yə istinadən məlumat verir.
Tarixən ovdanlar həm içməli suyun saxlanması, həm də təbii soyutma üçün istifadə olunub. Ovdanların su mənbəsi yeraltı torpaq və yağış sularıdır. Əsrlər əvvəl onlar su ehtiyatları baxımından böyük əhəmiyyət kəsb edirdisə, indiki vaxtda ovdanlardan o qədər də istifadə olunmur və onlar baxımsız vəziyyətdə qalıb.
Binəqədi rayonu, Xocəsən qəsəbəsində yerləşən, əsrlərlə yaşı olan su ovdanı baxımsız və natəmiz vəziyyətdədir. Hazırda isə ovdan nə istifadəyə yararlıdır, nə də ki tarixi abidə kimi qorunur.
Xocəsən qəsəbəsinin bələdiyyə nümayəndəsi Ağayar Məmmədov bildirib ki, qəsəbə ərazisində vaxtilə 5 ovdan var idi. Hazırda qalan iki ovdanın da vəziyyəti qənaətbəxş deyil. Sakinlər aidiyyəti orqanlara müraciət etsələr də, heç bir nəticə əldə edilməyib.
Baxımsızlığa məruz qalan su ovdanlarından biri də 19-cu əsrdə inşa edilən Maştağa qəsəbəsindəki Əmiraslan ovdanıdır. Tikilinin əsas hissəsi torpaq altında qalıb. Maştağa bələdiyyəsindən verilən məlumata görə, Əmiraslan ovdanının yerləşdiyi ərazi sahibkara məxsusdur. Bu halda qurum əraziyə müdaxilə etmək hüququna malik deyil. Ərazinin nəzarətsiz qalmasının naticəsi üfunət qoxusu və antisanitar vəziyyətdir.
Mədəni İrsin Qorunması, İnkişafı və Bərpası üzrə Dövlət Xidmətinin mətbuat katibi Fariz Hüseynli qeyd edib ki, Xocəsən və Maştağa qəsəbələrində yerləşən ovdanların qorunmasına dövlət xidməti tərəfindən nəzarət olunur. Maştağa qəsəbəsində yerləşən ovdan artıq investisiya siyahısına daxil edilib. Xocəsən qəsəbəsində yerləşən ovdanların isə investisiya siyahısına daxil edilməsi üçün təkliflər hazırlanır.
