Qərbi Kaspi Universitetinin sabiq sektor müdiri əcnəbi tələbələrin pulunu mənimsəyib. Bu haqda bu gün, 22 aprel tarixində Bakuplus.az Qafqazinfo-ya istinadən xəbər verir.
Asim Əliyev 2022-ci ilin avqust ayına qədər 22 əcnəbidən pullarını götürərək şəxsi ehtiyaclarına xərcləməkdə təqsirləndirilib.
O, Türkiyə, Nigeriya, Pakistan və Hindistan vətəndaşlarının təhsil haqqı kimi verdikləri ümumilikdə 36.000 manatı mənimsəyib.
A.Əliyev ona qarşı irəli sürülmüş ittihamları qəbul etməsə də, o, 36.000 manat məbləğində ziyanı tam olaraq ödəyib.
Qərbi Kaspi Universitetin əməkdaşları isə sabiq sektor müdirini yazılan məbləğdən çox ziyan vurmaqda ittiham edib və universitet təqsirləndirilən şəxsdən 70.000 manat tələb edib. Ancaq bu iddia rədd edilib.
Səbail rayon Məhkəməsinin qərarı ilə A.Əliyevə 1 il 6 ay müddətinə azadlığın məhdudlaşdırılması cəzası verilib.
Təqsirkar daimi yaşayış yerini hər gün saat 23:00-dan növbəti gün saat 07:30-dək tərk etməməli, eləcə də Bakı, Sumqayıt şəhərləri və Abşeron rayonu ərazilərini tərk etməməlidir.
