Bakıda universitetin kafedra müdiri vəfat edib. Bu haqda bu gün, 21 oktyabr tarixində Bakuplus.az Azərtac-a istinadən xəbər verir.
Azərbaycan Dövlət Bədən Tərbiyəsi və İdman Akademiyasının Bədən tərbiyəsi və idmanın nəzəriyyəsi və metodikası kafedrasının müdiri, professor, 68 yaşlı Nazim Məcidov dünyasını dəyişib.
N.Məcidov Azərbaycan Dövlət Bədən Tərbiyəsi İnstitutunu, daha sonra Moskvada Lenin ordenli Mərkəzi Dövlət Bədən Tərbiyəsi İnstitutunun aspiranturasını bitirib. Moskva şəhərində Bədən tərbiyəsi və idman sahəsində pedaqogika üzrə fəlsəfə doktoru elmi dərəcəsi alıb.
Bundan əlavə, uşaq yaşlarından cüdo ilə məşğul olan N.Məcidov sambo və cüdo üzrə dəfələrlə şəhər, respublika və ümumittifaq yarışlarının qalib və mükafatçısı olub.
Professor Nazim Məcidov 40 ildən artıq Azərbaycan Dövlət Bədən Tərbiyəsi və İdman Akademiyasında çalışıb. 100-dən çox elmi, elmi-metodiki əsərin, o cümlədən 1 monoqrafiya, 2 dərslik, 6 metodiki vəsait, 20 tədris proqramının və çoxlu sayda elmi məqalənin müəllifidir.
