Bakıda sərnişinləri yüksək səslə çağıran taksi sürücülərə qarşı tədbirlər görüləcək. Bu haqda bu gün, 17 fevral tarixində Report məlumat verib.
Binəqədi rayonu, Bakı Beynəlxalq Avtovağzal Kompleksinin ətrafında sərnişinlərin, piyadaların, həmçinin avtomobillərin maneəsiz hərəkətini təmin etmək məqsədilə polis əməkdaşları reyd keçirib.
Paytaxt ərazisində taksi fəaliyyəti ilə məşğul olan avtomobillər üçün xüsusi yerlər ayrılsa da, sürücülər avtomobillərini taksilər üçün nəzərdə tutulmayan yerlərdə saxlamağa davam edirlər.
Rayonlararası sərnişindaşıma ilə məşğul olan taksi sürücüləri avtomobillərini yolun hərəkət hissəsində saxladığına və digər nəqliyyat vasitələrinin hərəkətinə maneə törətdiklərinə görə cərimələniblər.
"Sürücülər yüksək səslə sərnişinləri cağırmaqla digər şəxslərə maneçilik törədirlər. Bu cür neqativ halların qarşısını almaq üçün tərəfimizdən lazımi tədbirlər görüləcək", - bunu açıqlamasında DİN-nin Mətbuat Xidmətinin polis leytenantı Nurlan Əliyev deyib.
