“Qırmızı Ürək” (Red Hearts) Fondu Ekologiya və Təbii Sərvətlər Nazirliyi və “Bravo” supermarketlər şəbəkəsi ilə birgə “Batareyaları təhvil ver, təbiəti qoru” adlı yeni layihəyə start verib. Bu haqda təşkilat öz Facebook səhifəsində məlumat yayıb.
Layihə çərçivəsində istifadəyə yararsız elektrik batareyaları toplanılır.
İşlənmiş batareyalar üçün xüsusi qutular ilkin olaraq Gənclik Mall, Əhmədli qəsəbəsi, 20 yanvar m/s, Koroğlu m/s, 28 Mall, Dəniz Mall və Zefir Mall-da olan Bravo marketlərdə yerləşdirilib.
Layihənin məqsədi ətraf mühitə və insan sağlamlığına mənfi təsiri minimuma endirmək üçün işlənmiş batareyaları digər tullantılardan ayırmaqdır. Gələcəkdə belə qutuların digər şəhər və rayonlarda da yerləşdirilməsi nəzərdə tutulur.
“Red Hearts” 2020-ci ilin əvvəlində Kapital Bank-ın əməkdaşlarından ibarət kiçik könüllü qrupu kimi fəaliyyətə başlayıb. Öz xeyriyyə təşəbbüsünü bütün ölkəyə yayan “Red Hearts” komandası Vətən müharibəsində iştirak edən əsgər, qazi, şəhid ailələrinə və övladlarına davamlı olaraq maddi və mənəvi yardım göstərir.
