Bakının Nərimanov rayonunda yeni avtomobil yolunun inşasına start verilir. Bu haqda bu gün, 3 may tarixində Bakuplus.az Azərbaycan Avtomobil Yolları Dövlət Agentliyinə (AAYDA) istinadən xəbər verir.
Aparılan tikinti işləri çərçivəsində Ziya Bünyadov prospektinə paralel olaraq Həsən Əliyev küçəsindən metronun “Koroğlu” stansiyasına qədər yeni avtomobil yolu salınacaq.
Yeni avtomobil yolu Aşıq Molla Cümə küçəsi ilə kəsişmədən Yusif Vəzir Çəmənzəminli küçəsi boyunca Keşlə bazarı istiqamətində, daha sonra “Bakmil” metrosunun arxası ilə Ələsgər Qayıbov küçəsi ilə kəsişməyə, sonra isə düz xətt olaraq Müzəffər Nərimanov küçəsinə qədər davam edəcək.
Bununla da Heydər Əliyev və Ziya Bünyadov prospektlərinə paralel və həmin prospektlərin mərkəzi aralığında yerləşən yeni yaşayış massivlərinə alternativ birbaşa nəqliyyat bağlantısının yaradılması təmin ediləcək.
