Azərbaycanda istehlaka yararsız şokoladın satışı dayandırılıb. Bu haqda bu gün, 1 aprel tarixində Bakuplus.az Qida Təhlükəsizliyi Agentliyinə istinadən məlumat verir.
İspaniya Krallığından Belçika Krallığına ixrac edilmiş “Cachet dark orqanik badam və albalı” məhsulunda Aflatoksin B1 və total aflatoksin miqdarının yolverilən həddən yüksək olduğu qeydə alınıb.
Araşdırma zamanı anbarda saxlanılan və satışda olan məhsullar (istehsal və son istifadə tarixləri 29.10.2022 və 29.01.2024 olan partiyası) geri çağırılıb.
Agentlik “Cachet dark orqanik badam və albalı” şokolad məhsulunun alışını həyata keçirmiş pərakəndə satış nöqtələrini məhsulun dərhal geri qaytarılmasını təmin etməyə, istehlakçıları isə bu məhsulu aşkar etdikdə bu barədə Agentliyin “1003” Çağrı Mərkəzinə məlumat verməyə çağırıb.
Aflatoksin bəzi növ mikroskopik kif göbələkləri tərəfindən ifraz olunan insanlar və heyvanlar üçün zəhərli bir maddədir. Bədxassəli şişlərə və qaraciyər sirrozuna səbəb olur, həmçinin immuniteti azaldır. Şiddətli aflatoksin zəhərlənməsi ilə beyin ödemi və kəskin qaraciyər çatışmazlığı mümkündür ki, bu da adətən ölümlə nəticələnə bilər.
