Avqust ayında Beynəlxalq Qızıl Xaç Komitəsinin (BQXK) əməkdaşları Azərbaycan tərəfinin məlumat verdiyi erməniəsilli şəxslərə yenidən baş çəkib. Saxlanılan şəxslərlə təkbətək görüşlər keçirilib və onların ailələri ilə əlaqə qurmaq üçün şərait yaradılıb.
BQXK mandatına uyğun olaraq, bu başçəkmələr zamanı saxlanılan şəxslərin rəftarı və saxlanma şəraitini qiymətləndirir. Həmçinin, şəxslərin ailələri ilə əlaqələri bərpa etmək və ya davam etdirmək üçün şərait yaradır. Müşahidələr və tövsiyələr yalnız saxlayan tərəflə paylaşılır və müzakirə edilir.
Qeyd edək ki, Azərbaycanın hüquq-mühafizə orqanları Qarabağda separatçı rejiminə rəhbərlik etmiş Arkadi Qukasyan, Bako Saakyan, Araik Arutyunyan, sabiq “xarici işlər naziri” David Babayan, eləcə də “parlament sədri” David İşxanyan, generallar Lyova Mnatsakanyan, David Manukyan və keçmiş “dövlət naziri” Ruben Vardanyanı həbs edərək Bakıya gətirib.
