Bakı İnzibati Məhkəməsində vətəndaşla Bakı Şəhər İcra Hakimiyyəti (BŞİH) arasında yaranmış maliyyə prosesi yekunlaşıb. Bu haqda bu gün, 4 noyabr tarixində Bakuplus.az Qaynarinfo-ya istinadən məlumat verir.
Hakim Mehriban Qarayevanın qərarı ilə vətəndaşa (ad-soyad açıqlanmır) 350.000 manat kompensasiya ödəniləcək.
Verilən məlumata əsasən, vətəndaşın Novxanı qəsəbəsində 4600 kv.m (46 sot) torpaq sahəsi var idi. Həmin sahə dövlət ehtiyacları üçün Fövqəladə Hallar Nazirliyinə (FHN) verilib. Bunun əvəzinə vətəndaşa Nizami rayonunda 4800 kv.m torpaq sahəsi təşkil edilib. Lakin bir müddət sonra bu sahənin 3000 kv.m hissəsi Binəqədi rayonunda torpaq sahəsi ilə əvəzləşdirilib.
Daha sonra həmin torpaq da dövlət ehtiyacları üçün vətəndaşdan geri alınıb və ona 1.750.000 manat kompensasiya ödənilməsi Bakı Şəhər İcra Hakimiyyətinə həvalə edilib.
Vətəndaş naməlum səbəbdən 1.750.000 manat kompensasiyanın 850.000 manatından imtina edərək, 900.000 manat ödənilməsini xahiş edib. Binəqədi rayonundakı 3000 kv.m torpağa görə ona kompensasiya ödənilməsi təmin edilib.
Bundan sonra vətəndaş BŞİH-dən qalan 1800 kv.m torpaq sahəsinə görə kompensasiya tələb edib. Lakin qurum vətəndaşa cavab məktubunda Maliyyə Nazirliyinin məsuliyyət daşıdığını göstərib. Vətəndaş yenə məhkəməyə müraciət edərək 1800 kv.m torpaq sahəsinə görə ona 1.350.000 manat kompensasiya ödənilməsini xahiş edib.
Məhkəmə iddianı qismən təmin edərək vətəndaşa 350.000 manat məbləğində təzminat ödənilməsinə qərar verib.
