Bakı Şəhər İcra Hakimiyyətində paytaxtın iqtisadi strukturları rəhbərlərinin iştirakı ilə geniş müşavirə keçirilib. İclasda yaz-yay mövsümünün başlanmasına hazırlıqla bağlı bir sıra məsələlər müzakirə olunub. Bu haqda bu gün, 2 mart tarixində Bakuplus.az məlumat verir.
Şəhər parklarının və istirahət zonalarının abadlaşdırılması ilə bağlı müvafiq strukturların rəhbərlərinə tapşırıqlar verilib.
İclasda bəzi respublika təşkilatlarının və icra hakimiyyətinin müvafiq strukturlarının işi kəskin tənqid olunub. Belə ki, bir sıra tarixi tikililər səhvən Mədəniyyət Nazirliyi tərəfindən tarixi irs siyahısına salınmadığından sökülmək təhlükəsi ilə üzləşib. Yalnız Prezident İlham Əliyevin və Azərbaycanın birinci xanımı, Heydər Əliyev Fondunun prezidenti Mehriban Əliyevanın müdaxiləsindən sonra bir çox memarlıq tikililəri xilas edilib.
Paytaxtın rayonlarının icra orqanlarına tapşırılıb ki, Memarlar İttifaqı və digər təşkilatlarla razılaşdırılaraq mədəni-tarixi dəyəri olan memarlıq tikililərinin tam siyahısını qısa müddətdə müəyyən edib Mədəniyyət Nazirliyinə təqdim etsinlər.
Görüşdə paytaxt sakinləri üçün son dərəcə aktual olan qəzalı binaların problemi qaldırılıb. Bildirilib ki, qəzalı binaların əksəriyyəti sovet dövründə tikilib və onların istismar müddəti başa çatıb. Xüsusilə qeyd olunub ki, ölkə rəhbərliyinin səyləri nəticəsində son 5 ildə Bakıda 1239 qəzalı bina sökülüb, on minlərlə insan yeni mənzillərə köçürülüb və ya müvafiq kompensasiyalar alıb.
Həmçinin yazın gəlişi ilə əlaqədar Bakıda “Novruz bayramını təmiz şəhərlə qarşılayaq” devizi altında iməciliyin keçirilməsi qərara alınıb.
