Bakı Şəhər Halqası Əməliyyat şirkətinin İdman Əməliyyatları şöbəsinin rəisi işləmiş Çingiz Mehdiyevin məhkəmə prosesi davam edir. Bu haqda bu gün, 6 may tarixində Bakuplus.az APA-ya istinadən xəbər verir.
Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə keçirilən prosesdə təqsirləndirilən şəxs ifadə verib.
Çingiz Mehdiyev həyat yoldaşının ona qarşı əsassız ittihamlar irəli sürdüyünü deyib:
"Mütəxəssis olduğum üçün məni 2015-ci ildə "Formula 1"-də işə götürdülər. İşə götürüləndə vəzifəm əməliyyatlar şöbəsinin rəisi idi. 2016-cı ildən isə vəzifəmin adı dəyişdi, idman əməliyyatları üzrə menecer oldum. Yarışın keçirilməsi üçün xüsusi məhsullar alınmalı idi. Bu məhsullar da Azərbaycanda istehsal olunmurdu. Bu məqsədlə direktor Arif Rəhimov və satınalmalar üzrə direktor Zaur Məlikaslanovla birgə xaricə getdik, həmkarlarımızla görüşdük. Geri qayıdandan sonra məhsulların satın alınması üçün 90 milyon AZN vəsait ayrıldı.
Bəzi məhsulların alınmasında çətinliklər yaranmışdı. Bu iş üzrə Azərbaycanda ixtisaslaşmış şirkət və ya ekspert yox idi. Ona görə də bu problemin həll edilməsi mənə tapşırıldı. Qiymətlərlə bağlı Cenevrədəki ofislə danışdım. Mənə əlaqələr verdilər. Qiymətlərlə bağlı konsultantların qiyməti saatbaşı hesablanır. Danışdığım şirkətdə qiymət ucuz idi. 2 ay ərzində ümumi 350.000 ABŞ dolları edirdi. Malların tədarükü ilə bağlı görüşlər keçirdik. Zaur Məlikaslanov xüsusi mallar haqqında anlayışı olmadığını dedi. Mənə deyildi ki, təcili minimal qiymətləri həll etməliyəm. Mən də "Dayton" şirkətini təklif etdim. Mallar sifariş verildi və şirkətə pul ödənildi”.
Növbəti iclasda təqsirləndirilən Çingiz Mehdiyev məhkəmənin suallarını cavablandıracaq. Proses 3 iyun tarixində davam etdiriləcək.
