Bakıda və Abşeron ərazisində metro və avtobus sərnişinləri “Birbank” mobil əlavəsində yaradılmış QR-biletdən istifadə etməklə gediş haqqını ödəyə bilərlər. Bu haqda bu gün, 10 iyul tarixində Bakuplus.az “Kapital Bank”a istinadən məlumat verir.
Bunun üçün “Birbank” mobil tətbiqində “Ödənişlər və köçürmələr” bölməsinə daxil olaraq “BakıKart”ı seçmək lazımdır. Daha sonra ödəniş ediləcək kart və məbləği seçib QR-bileti yaratmaq olar. Həmən QR-kod yalnız bir gediş üçün 5 dəqiqə ərzində etibarlıdır. 5 dəqiqə ərzində biletdən istifadə edilmədiyi halda silinən məbləğ 2 saat ərzində müştərinin balansına geri qaytarılır.
Bilet qiymətləri “BakıKart”ın tariflərinə uyğunlaşdırılıb. Sərnişinlər marşrut xəttindən asılı olaraq, gediş haqqı məbləğini dəyişə və ya bir neçə QR-bilet yarada bilərlər. Yenilikdən istifadə üçün “Birbank” mobil tətbiqinin ən son versiyada yenilənməsi mütləqdir.
