27 sentyabr tarixində, “Bakı Metropoliteni” QSC-də Vətən müharibəsi şəhidlərinin xatirəsi anılıb. Bu haqda qurumun mətbuat xidməti məlumat yayıb. Anım mərasimində “Bakı Metropoliteni”nin rəhbərliyi də iştirak edib.
“Bakı Metropoliteni” QSC-nin rəhbərliyi və kollektivinin nümayəndələri “Nərimanov” elektrik deposunda 20 Yanvar və Birinci Vətən müharibəsinin metropolitençi şəhidlərinin xatirəsinə ucaldılmış abidə kompleksini ziyarət ediblər. Abidə önünə gül dəstələri düzülüb, şəhidlərimizin xatirəsi bir dəqiqəlik sükutla yad edilib.
Mərasimdə Ermənistan Respublikasının silahlı qüvvələrinin Gəncə, Bərdə, Tərtər və bir sıra digər müharibə getməyən əraziləri müxtəlif növ silahlardan, o cümlədən ağır artilleriyadan istifadə edərək atəşə tutması nəticəsində dinc vətəndaşlarımızın yaralanması da qeyd olunub.
Vətən müharibəsində iştirak etmiş “Bakı Metropoliteni”nin əməkdaşları arasında 7 nəfər qazi kimi kollektivə qayıdıb, 4 metropolitençi övladı isə bu müharibədə şəhidlik zirvəsinə yüksəlib.
Döyüşlərdə şücaət göstərmiş metropolitençilərin fədakarlığı dövlətin müxtəlif təltifləri ilə xüsusi qeyd olunub.
