İyunun 16-dan etibarən metro qatarlarının hərəkət cədvəlində dəyişiklik olacaq. Bu haqda bu gün, 14 iyun tarixində Bakuplus.az "Bakı Metropoliteni" QSC-yə istinadən məlumat verir.
Yeni tədris mövsümü başlayanadək qüvvədə olacaq qrafikə uyğun olaraq, “Həzi Aslanov” - “28 May” mənzili və əks istiqamətdə hərəkət edən qatarlar arasında interval əsas sərnişin axınının olduğu saatlarda - hər iş günü 07:00-dan 21:00-a kimi 2,5 dəqiqə olacaq. Sərnişinlərin az olduğu səhər və gecə saatlarında qatarlar arasında interval 3 dəqiqə və daha çox olacaq.
“28 May” stansiyasında Qırmızı və Yaşıl xətlərin qovuşması nəzərə alınaraq, “28 May” stansiyasından “İçərişəhər” və “Dərnəgül” stansiyalarına qatarlar ikiqat intervalla hərəkət edəcək.
Şənbə və bazar günləri, həmçinin bayram günlərində qatarlar arası saat 07:00-dan 21:00-a qədər interval 3 dəqiqə olacaq.
Sərnişinlərin marağını nəzərə alaraq, “Bakmil” stansiyasına və əks istiqamətdə qatarların hərəkət cədvəli Bakı Metropoliteninin saytında dərc olunub.
