Bir sıra futbol klubları Bakıda stadion axtarışındadırlar. Bu haqda bu gün, 10 iyul tarixində Bakuplus.az Oxu.az-a istinadən xəbər verir.
"COP29"a görə Olimpiya Stadionunun təmirə bağlanması üzündən meydansız qalan komandalar axtarışlara başlayıb.
“Araz-Naxçıvan” klubunun icraçı direktoru Eldəniz Yusubov bildirib ki, Bakı Olimpiya Stadionunda 3 komanda məşq edirdi. Böyük ehtimalla məşqlər "Dalğa Arena"da keçəcək.
"Turan Tovuz" klubunun mətbuat katibi Süleyman Tağıyev də axtarışlar aparıldığını qeyd edib.
"Hazırda Qəbələ şəhərində təlim-məşq toplanışı keçiririk. Olimpiya Stadionu təmirə bağlandığı üçün yeni stadion axtarmalı olacağıq. Bu məsələni təlim-məşq toplanışlarımız başa çatmamış həll etmək barədə düşünürük", – deyə o qeyd edib.
Olimpiya Stadionu noyabrda keçiriləcək "COP29" tədbiri ilə əlaqədar olaraq təmir üçün bağlanır. Bu prosesin dekabra qədər davam edəcəyi gözlənilir.
