Bakının Nərimanov rayonunda yerləşən “Hermes” restoranında xuliqanlıq edən 21 yaşlı gənc barəsində məhkəmə qərar çıxarıb. Bu haqda bu gün, 16 oktyabr tarixində Bakuplus.az Qaynarinfo-ya istinadən məlumat verir.
Ordubad rayonundan olan Seymur Vəliyev (ad və soyad şərtidir) barəsində polisə şikayət daxil olub. Restoranda sifarişi ödəməyə pulunun olmadığını anlayan şəxs qızıl qolbaqla ödəniş etmək qərarına gəlib. Müəssisənin əməkdaşları bahalı qızıl-zinət əşyalarını götürməkdən imtina ediblər və bundan sonra münaqişə yaranıb. Nəticədə restoranın administratoru Vəliyev barədə polisə şikayət edib.
Sərxoş vəziyyətdə olan şəxs hüquq-mühafizə orqanlarının əməkdaşları ilə mübahisə edib. Vəliyev saxlanılıb. Məhkəmə iclasında o, törətdiyi əməldən peşman olduğunu bildirib və məhkəmədən tövbəsini nəzərə alıb ədalətli qərar çıxarılmasını xahiş edib.
Məhkəmə Vəliyevi İnzibati Xətalar Məcəlləsinin “Xırda xuliqanlıq” və “Polis əməkdaşının qanuni tələbinə qəsdən tabe olmama” maddələri ilə nəzərdə tutulmuş inzibati xətanı törətməkdə təqsirli bilib və barəsində 8 gün müddətinə həbs qətimkan tədbiri seçilib.
