Gömrükçülər vətəndaşların bağlamalarını aça bilərlərmi? Bu haqda bu gün, 13 may tarixində Bakuplus.az ATV-yə istinadən xəbər verir.
Vətəndaşlar bir çox hallarda xaricdən sifariş etdikləri bağlamanın gömrükdə açılmasından şikayət edirlər. Onlar bağlamalarının bəzi hallarda zədələnməsindən də narahatdırlar.
Gömrük məcəlləsinə əsasən, gömrük orqanlarının vəzifəli şəxslərinin istənilən bağlamanı açmaq və ya açılmasını tələb etmək hüququ var.
“Beynəlxalq poçt göndərişləri gömrük nəzarətindən keçirilərkən post operatorları tərəfindən və yaxud daşıyıcı şirkətlər tərəfindən gömrük nəzarətinə, baxışına və yoxlanışına təqdim edilir. Yəni onların iştirakı olmadan gömrük əməkdaşı heç bir baxış keçirmir və bu baxış prosesi də kamera nəzarəti altında baş verir. Mal daşıyıcı şirkətlər tərəfindən baxışa təqdim olunur”, – deyə Logistika Mərkəzi Gömrük postunun rəisi Rövşən Mahmudazə qeyd edib.
Belə ki, rentgen qurğusunda aparılan yoxlama zamanı şübhəli bilinən bağlamalar kənara qoyulur. Daha sonra məhsulu ölkəyə gətirən karqo şirkəti nümayəndəsinin iştirakı ilə açılaraq yoxlanılır.
Gömrük postunun əməkdaşları indiyə qədər müxtəlif soyuq silahlar, hətta məşhur kosmetika mağazasından olan bağlamada narkotik maddə aşkar ediblər.
