Bakıda bir qrup sakin mənzillərini qanuni qaydada aldıqları halda evsiz qalmaq təhlükəsi ilə üzləşdiklərini iddia edir.
Bakuplus.az-a müraciət edən vətəndaşların sözlərinə görə, onlar 2022-ci ildən etibarən Suraxanı rayonu, Qaraçuxur qəsəbəsi, Fərman Kərimzadə küçəsində yerləşən binadan mənzillər alıblar. Sakinlər bildirirlər ki, mənzilləri binanın icraçı direktoru Orxan Mürsəlovdan notariat qaydada, bank vasitəsilə ödəniş edərək və bütün vergiləri ödəməklə əldə ediblər. Onların sözlərinə görə, alqı-satqı tam qanuni şəkildə rəsmiləşdirilib.
İddialara əsasən, sonradan Rəşad Səlimov adlı şəxs binanın ona məxsus olduğunu bildirərək məhkəməyə müraciət edib. Sakinlər isə bu iddianı qəbul etmədiklərini, həmin şəxsin sözügedən ərazidə cəmi 16 kvadratmetr sahəyə sahib olduğunu və binaya sahiblənməyə dair hər hansı hüquqi əsasının olmadığını bildirirlər.
Onların sözlərinə görə, Suraxanı Rayon Məhkəməsi sakinlərin əleyhinə qərar qəbul edib və qərara əsasən bina Rəşad Səlimova verilib. Sakinlər qeyd edirlər ki, Əmlak Məsələləri üzrə aidiyyəti qurumun araşdırması nəticəsində də Rəşad Səlimovun həmin ərazidə yalnız 16 kvadratmetr sahəyə malik olduğu müəyyən edilib.
Vətəndaşlar həmçinin iddia edirlər ki, Orxan Mürsəlovun Rəşad Səlimova borcu olub və tərəflər arasında yaranan maliyyə mübahisəsi hazırkı vəziyyətə gətirib çıxarıb. Onların sözlərinə görə, Orxan Mürsəlovun Rəşad Səlimova vurduğu ziyanın əvəzini hazırda mənzilləri qanuni şəkildə almış sakinlər ödəməli olurlar. Onlar bildirirlər ki, Orxan Mürsəlov hazırda məhz borc məsələsi ilə bağlı həbsdədir.
Vətəndaşlar vurğulayırlar ki, mənzilləri etibarnamə ilə satış səlahiyyəti olan şəxsdən alıblar və bütün ödənişləri bank vasitəsilə həyata keçiriblər. Onlar ödədikləri vəsaitin, eləcə də dövlətə ödənilən vergilərin taleyi ilə bağlı suallarının cavabsız qaldığını bildirirlər.
Hazırda 16 ailənin evsiz qalmaq təhlükəsi ilə üz-üzə qaldığını deyən sakinlər aidiyyəti dövlət qurumlarına müraciət edərək, məsələnin yenidən araşdırılmasını, hüquqlarının qorunmasını və yaranmış problemin ədalətli həllini istəyirlər.
