Bakıda orta məktəb şagirdi təhsil aldığı müəssisədə təhqir edilib.
Bu şikayətlə oxu.az-a Suraxanı rayonu Dədə Qorqud qəsəbəsi, ev 29-da yaşayan Ceyran Kazımova müraciət edib. Valideyn bildirib ki, övladı Hacət Nemət oğlu Bədəlov Dədə Qorqud qəsəbəsində yerləşən 315 nömrəli tam orta məktəbin 8B sinfində təhsil alır. Bir müddət əvvəl məktəbin Rahibə adlı ingilis dili müəllimi dərs zamanı oğlunu sinif yoldaşlarının qarşısında təhqir edib. Nəticədə oğlu psixoloji sarsıntı keçirib. Valideyn iddia edir ki, Rahibə adlı ingilis dili müəllimi nəfəsalma problemi olan, buna görə də təravətli konfet və ya saqqız çeynəyən övladını lövhə qarşısına çıxarıb, çeynədiyi saqqızı oğlunun başına yapışdırıb. "Daha sonra müəllim saqqızın saçdan qopmadığını görüb, oğlumun saçını qayçı ilə qırxıb, saqqızı təmizləyib. Müəllimə oğluma tapşırıb ki, bu barədə evdə valideynlərinə nəsə desə, onu orta məktəbdən qovacaq, üzərinə şər atacaq", - Ceyran Kazımova deyib.
Valideyn bildirib ki, şagird dərsdən sonra evə gəlib və güclü psixoloji sarsıntı keçirib.
Şagirdin anası məsələ ilə bağlı hüquq-mühafizə orqanlarına müraciət edib.
Məsələ ilə bağlı Bakı Şəhəri üzrə Təhsil İdarəsindən bildirilib ki, qeyd olunan məsələ ilə bağlı valideynin hüquq-mühafizə orqanlarına müraciəti əsasında aparılmış araşdırma nəticəsində iddianın əsassız olduğu müəyyən edilib və bununla bağlı rəsmi qərar qəbul olunub:
"Həmçinin məktəbdaxili araşdırma aparılıb, müəllim, valideyn və şagirdə uyğun tövsiyələr verilib. Eləcə də məsələ ilə bağlı Elm və Təhsil Nazirliyinin Uşaq Müdafiəsi İdarəsi və Bakı Şəhəri üzrə Təhsil İdarəsi tərəfindən araşdırma aparılır".
