Bakıda ata qızını spirtli içkiyə görə döyüb.
Bakuplus.az-n əldə etdiyi məlumata görə, hadisənin istintaqı Bakı şəhəri Nərimanov Rayon Məhkəməsində keçirilib.
Belə ki, təqsirləndirilən Cavid Quliyev (ad şərtidir) 1982-ci ildə Ermənistanda anadan olub. O, spirtli içki qəbul etdikdən sonra evə gəlib. Birlikdə yaşadığı 2006-cı il təvəllüdlü qızı Sevda Quliyevanın (ad şərtidir) onu ata kimi saymadığını bəhanə edərək boğazından tutub divara vurub və başına bir neçə zərbə endirib. Nəticədə qızın gözünə qan sızıb və bədən xəsarətləri alıb.
Cavid Quliyev Azərbaycan Respublikası CM-nin 128.1-ci (sağlamlığa zərbə vurma) maddəsi ilə təqsirləndirilib.
Məhkəmə iclasında təqsirləndirilən Cavid Quliyev özünü təqsirli bilərək ifadəsində göstərib:
“2005-ci ildə arvadım Nigar ilə ailə həyatı qurduq. Rəsmi nikahdan iki övladımız dünyaya gəldi. Ailəmi dolandırmaq üçün usta kimi fəaliyyət göstərir, mənzilləri təmir edirəm. Son zamanlar iş tapa bilmədiyim üçün maddi vəziyyətim pisləşdi və özümü rahatlatmaq üçün spirtli içki qəbul etməyə başladım. İçki içdiyim üçün yoldaşımla aramda daimi mübahisələr olurdu.
Hadisə günü spirtli içki qəbul edib evə gəldim. Yoldaşım buna görə dava yaratdı və qızım Sevda da gəlib ona qoşulub irad bildirdi. Nigarın üstünə gedəndə qızım qarşımı kəsdi. Əsəbiləşib qızımın boğazından tutub divara itələdim və başından bir neçə dəfə zərbə vurdum”.
Məhkəmə baxışında zərərçəkmiş Sevda Quliyeva ifadəsində qeyd edib:
“Atam son zamanlar mütəmadi olaraq spirtli içki qəbul edib, sərxoş halda evə gəlirdi. Hadisə günü gecə atamın səsinə oyanıb gördüm ki, anamla mübahisə edir. Mən də spirtli içki qəbul etdiyi üçün irad bildirdiyimə görə mənim boğazımdan tutub divara vurdu. Daha sonra başıma dəfələrlə zərbə endirdi”.
Beləliklə, məhkəmə tədqiq edilmiş sübutlara məcmu halda hüquqi qiymət verərək Cavid Quliyevi təqsirli bilib. O, 9 ay müddətinə azadlıqdan məhrum edilib.
Fidan İlqar
