22 aprel yazıçı, publisist və Türkiyənin dövlət və siyasi xadimi olmuş Səməd Ağaoğlunun doğum günüdür.
Səməd Ağaoğlu 1909-cu ildə Bakıda dünyaya gəlib. Hələ körpə ikən atası, görkəmli ictimai-siyasi xadim, mütəfəkkir Əhməd bəy Ağaoğlunun Türkiyəyə mühacirəti ilə ömrünü, taleyini bu ölkəyə bağlamalı olub. Ankarada hüquq fakültəsini bitirdikdən sonra bir müddət Strasburqda işləyib. Bu illərdə yaradıcılığa başlayıb, ilk qələm təcrübələrini sınaqdan keçirib. Sonralar Fransada keçən illərini əks etdirən "Strasburq xatirələri" adlı kitabı işıq üzü görüb. Türkiyəyə döndükdən sonra bir sıra mühüm dövlət işlərində çalışıb, millət vəkili seçilib, nazir olub. Siyasi baxışlarına görə bir müddət həbsdə yatıb. 1960-cı ildə Calal Bayar — Adnan Menderes işinə görə, yəni 1960-cı il, 27 may dövlət çevrilişi ilə əlaqədar ömürlük həbs cəzasına məhkum olunub, 1964-cü ildə amnistiyaya düşüb və azadlığa buraxılıb. 1967-ci ildə Azərbaycanı ziyarət edib.
Səməd Ağaoğlu 1982-ci ilin avqust ayının 6-da, 73 yaşında dünyasını dəyişib.
