Bakıda doğma qızını xüsusi amansızlıqla qətlə yetirməkdə təqsirləndirilən Yelmar Atakişiyevin cinayət işi üzrə məhkəmə olub.
Lent.az xəbər verir ki, Bakı Ağır Cinayətlər Məhkəməsində hakim Elnur Nuriyevin sədrliyi ilə keçirilən prosesdə zərərçəkmiş şəxsin hüquqi varisi - anası ifadə verib.
O bildirib ki, hadisə günü evə saat 21-də gələndə qızının yerdə xırıldadığını görüb. Ondan bir müddət əvvəl evə gələn oğlu Səbuhidən nə baş verdiyini soruşduqda, o da bacısını bu halda gördüyüyü deyib. Əri Yelmardan nə baş verdiyini soruşanda, o Cəmaləni döydüyünü bildirib. Qıza heç nə olmayacağını bildirərək, təcili yardıma zəng etməyə qoymayıb və evdən çıxıb. Sonra evlərinə bacısı oğlu və qaynı gəlib. Təcili yardıma təxminən 2 saatdan sonra zəng ediblər. Qızının üzündə və boğaz nahiyyəsində çoxsaylı xəsarət və sıyrıq izlərinin, hematomaların olması müəyyən edilib.
Qadın qeyd edib ki, ərində manyaklıq əlamətləri olub. İddia edib ki, Yelmar qızına təcavüz edib, sonra isə onu boğaraq, öldürüb.
Yelmar Atakişiyev bildirib ki, cəzaçəkmə müəssisəsində cəza çəkərkən yanına gələn oğlundan bacısının yüngül həyat tərzi keçirməsi haqda şikayət eşidib. Oğluna deyib ki, sən heç nə etmə, "özüm burdan çıxandan sonra onunla danışacağam".
Hadisə günü telefonuna baxmaq istədikdə, Cəmalə buna icazə verməyib. Buna görə onu döyüb, sonra isə boğub. O arvadına qızını boş buraxdığını irad tutub. Aralarında mübahisə yaranıb.
Şahid qismində dindirilmiş təqsirəndirilən şəxsin böyük oğlu bildirib ki, arvadı ilə boşanıb. Bir müddətdən sonra eşidib ki, atası evdə gəlinə sataşıb və əxlaqsız hərəkətlərə cəhd edib. Atakişiyev isə deyib ki, oğlunun ailəsinin dağılmasına bu səbəb olmayıb.
Məhkəmə iclası mayın 30-da şahid ifadələri ilə davam etdiriləcək.
Qeyd edək ki, hadisə ötən il noyabrın 10-da Zabrat qəsəbəsində baş verib. Daxil olan məlumat əsasında 15-ci polis bölməsinin əməkdaşları evdə 42 yaşlı Cəmalə Atakişiyevanın, üzərində zorakılıq əlamətləri olan meyitini aşkar ediblər.
Şübhəli şəxs qismində mərhumun atası Yelmar Atakişiyev saxlanılıb. Sabunçu rayon prokurorluğunda cinayət işi başlanılıb, İstintaq tərəfindən ona qarşı CM-nin 120.2.4-cü (xüsusi amansızlıqla qəsdən adam öldürmə) maddəsi ilə ittiham irəli sürülüb.
