Özlərini “Nova kredit” şirkətinin əməkdaşları kimi təqdim edən şəxslər kredit vermək adı ilə camaatı aldatmaqla məşğuldurlar.
Bu barədə Bakuplus.az-a Xətai rayonu, Azadlıq küçəsi sakini Növrəstə Abdullayeva məlumat verib.
O bildirib ki, 8 min manat kredit götürmək məqsədilə onlayn qaydada “Nova kredit” kimi təqdim edilən şirkətə müraciət edib. Şirkətin Aygün və Həsən adlı əməkdaşları ondan ümumilikdə 365 manat ödəniş etməsini istəyiblər, bundan sonra kart hesabına 8 min manatın köçürüləcəyini deyiblər. Ancaq kredit kimi nəzərdə tutulan məbləğ vətəndaşın hesabına köçürülməyib. Hər dəfə “narahat olmayın, pul hesabınıza oturdulacaq” deyilsə də, vədə əməl edilməyib.
Növrəstə Abdullayevanın anası bu yaxınlarda vəfat edib, onun fırıldaqçılara ödədiyi məbləğ isə müvafiq qurum tərəfindən ödənilən "dəfn pulu" olub.
O, üzləşdiyi vəziyyətlə bağlı Daxili İşlər Nazirliyinin (DİN) “102” qaynar xəttinə məlumat verib. DİN-dən isə şikayəti Xətai rayonu 34-cü polis bölməsinə yönləndiriblər. Növrəstə Abdullayevanı qəbul edən polis əməkdaşı məsələ ilə bağlı araşdırma aparıldığını söyləyib.
Qeyd edək ki, vətəndaşı aldadan şəxslər insanlarla +994 70 604 88 18 nömrəsi vasitəsilə əlaqə yaradır. Göndərilən məlumatlarda bu nömrənin Həsən Məmmədova məxsus olduğu qeyd edilir.
Bir məqamı da xüsusi olaraq qeyd edək ki, DİN hər gün vətəndaşlara müraciət edərək vətəndaşlara şübhəli zənglərdən gələn cəlbedici qazanc, sığorta, viza işləri, bank hesablarının möhkəmləndirilməsi, mədaxil üzrə ödənişlərlə əlaqəli təkliflərə diqqətlə yanaşmağı tövsiyə edir. Qəti formada şəxsi bank məlumatlarının naməlum şəxslərə verməmək də tövsiyyə edilir, təhlükə olduğu vurğulanır.
Onu da xatırladaq ki, "Nova Credit Bank Olmayan Kredit Təşkilatı" MMC adına açılan saxta saytlar və sosial şəbəkə səhifələri barədə vətəndaşları bir neçə dəfə xəbərdar edib.
Qeyd edilib ki, bir qrup kiberdələduz qeyri-qanuni yolla maddi vəsait əldə etmək məqsədilə "Nova Credit BOKT" MMC-nin "Facebook", "Instagram" və digər sosial şəbəkələrdə rəsmi səhifəsinə oxşar profillər yaradır. Onların hədəfi onlayn səhifələrdə məsafədən istehlak krediti əldə etmək istəyən vətəndaşlardır. Kiberdələduzlar kredit təşkilatının nümayəndəsi qismində saxta "WhatsApp" nömrələrindən bu vətəndaşlara yazaraq əlverişli şərtlərlə kredit təklif edir və müvafiq təhlildən sonra krediti əldə etmək üçün müştəridən kreditin xidmət komissiyası adı ilə onlara kartdan karta və ya müvafiq veb-ünvan göndərməklə kart köçürməsi edilməsini tələb edirlər. Məbləğ karta köçürüləndən sonra, saxta səhifələrdə qeyd edilmiş mobil telefonla artıq əlaqə qurmaq mümkün olmur.
Kamran Rza
