Bakı şəhəri, Bayıl qəsəbəsi, Dağlıq küçəsi 24 ünvanında yerləşən və 1882-ci ildə Nobel qardaşları tərəfindən inşa edilmiş tarixi bina plana düşüb.
Lent.az-ın müxbiri əraziyə gedərək araşdırma aparıb.
Sakinlərin sözlərinə görə, rəsmi qurumlar binanın qəzalı vəziyyətdə olduğunu əsas gətirir, bildirirlər ki, divarları çat-çatdır və təhlükə yaradır. Artıq binanın bir hissəsi çökərək qonşu evin damına ciddi ziyan vurub. Ev sakinləri təxliyə edilib. Binanın pilləkənləri dağılmış və təhlükəli vəziyyətdədir. Çatlamış beton parçaları binanın həyətindən keçənlər üçün təhlükə yaradır. Sakinlər narazıdırlar ki, hər an beton parçaları qopub özlərinin, uşaqlarının başına düşə bilər.
Hazırda sakinlərin bir qismi evlərindən köçürülüb, lakin digərləri onlara təklif olunan məbləğ – hər kvadratmetr üçün 1550 manat – ilə razılaşmır. Sakinlər bu qiymətin onların yeni ev almaq imkanlarını təmin etmədiyini deyirlər. Onlar bildirirlər ki, bura şəhərin mərkəzinə çox yaxındır və ödənilən kompensasiya ilə ancaq Bakı kəndlərindən ev almaq mümkündür.
Sözügedən küçədə yaşayan Vasif Ələkbərov da vəziyyətdən narazılığını bildirir. Onun evi tarixi binadan cəmi 2 metr məsafədə yerləşir və söküntü zamanı evinə zərər dəyməsindən ehtiyat edir. Vasif Ələkbərovun sözlərinə görə, evinin plana daxil edilmədiyi bildirilib, lakin fiziki olaraq çox yaxın məsafədə yerləşdiyi üçün təhlükə altındadır.
Sakinlər aidiyyəti qurumlardan məsələ ilə bağlı daha şəffaf yanaşma, qiymətləndirmələrin yenidən aparılması və təhlükəsizlik tədbirlərinin gücləndirilməsini tələb edirlər. Hazırda ərazidə narahatlıq hökm sürür.
