Xəzər Rayon Məhkəməsində qəsdən sağlamlığa yüngül zərər vurmada təqsirləndirilən Vüsal Kərəmovun (adı, soyadı şərtidir) cinayət işi üzrə məhkəmə istintaqı başa çatıb.
Pravda.az xəbər verir ki, iş materiallarına əsasən, hadisə bu ilin fevralında təqsirləndirilən şəxsin paytaxtın Yasamal rayonunda yerləşən yaşadığı ünvanda baş verib. Belə ki, ailə münaqişəsi zəminində yaranmış mübahisə zamanı Vüsal Kərəmov qardaşının arvadı, zərərçəkmiş İradə Kərimovaya qarşı fiziki zor tətbiq edib.
Araşdırmalarla müəyyən edilib ki, təqsirləndirilən şəxs zərərçəkmiş şəxsin baş nahiyəsinə bir dəfə, burun nahiyəsinə isə iki dəfə yumruq zərbəsi endirib.
Məhkəmə iclasında Vüsal Kərəmov ona qarşı irəli sürülmüş ittiham üzrə özünü təqsirli bildiyini qeyd edib. O, törətdiyi əməldən peşman olduğunu və zərərçəkmiş şəxslə barışdığını deyib.
Təqsirləndirilən şəxs məhkəmədən barəsində olan sadələşdirilmiş icraat materialına bəraətverici əsaslar olmadan xitam verilməsini xahiş edib.
Məhkəmə iclasında İradə Kərimova da təqsirləndirilən şəxs ilə barışdığını, ona qarşı heç bir şikayət və tələbinin olmadığını bildirib.
Sonuncu keçirilən prosesdə hökm oxunub. Məhkəmənin hökmü ilə Vüsal Kərəmov cinayət məsuliyyətindən azad edilib.
