Bakının Xəzər rayonunda yol verməmək üstündə iki sürücü arasında mübahisə davaya, daha sonra isə cinayətə çevrilib.
Demokrat.az xəbər verir ki, hadisə ötən ilin sentyabrın 26-da Binə qəsəbəsində, "İmam Həsən" məscidinin yanında baş verib. Sürücülük vəsiqəsi olmayan 2000-ci il təvəllüdlü Sahib "Mercedes" mikroavtobusunu idarə edərkən digər sürücü Nurlanın yol verməməsinə görə onunla mübahisə edib.
Sahib əvvəlcə Nurlanı təhqir edərək burnuna yumruq vurub. Zərərçəkmiş hadisə yerindən uzaqlaşsa da, Sahib onun arxasınca gedərək evinin qarşısında təkrar döyüb.
Məhkəmə Sahibin barəsində Cinayət Məcəlləsinin 127.2.3 və 221.1-ci maddələri ilə iş açıb. O, ittihamı qəbul edib və hərəkətini əsəbi olması ilə izah edib.
Xəzər Rayon Məhkəməsinin hökmü ilə Sahib 2 il 3 ay 14 gün müddətinə azadlığın məhdudlaşdırılması cəzası alıb. Ona elektron nəzarət vasitəsi taxılıb, saat 23:00-dan 07:00-dək evini, eləcə də Bakı şəhərini tərk etməsi qadağan olunub.
Cəzanın icrasına Bakı Şəhər Probasiya İdarəsi nəzarət edəcək.
