Azərbaycan Dövlət Neft və Sənaye Universiteti (ADNSU) tədqiqat sahəsində fərq yaratmaq istəyən beynəlxalq təcrübəli tədqiqatçı müəllimlər axtarır.
Bakuplus.az-ın xəbərinə görə, bu barədə universitetdən məlumat verilib.
Bildirilib ki, elmi dərəcə və elmi ada görə mövcud olan əmək haqqının 3 mislinə (3600-6120 azn) bərabər əməkhaqqı ilə ADNSU-da beynəlxalq səviyyəli akademik karyera imkanı əldə etmək olar.
Tələb olunan müvafiq sahələr: Riyaziyyat-Fizika elmləri, Yer elmləri, Mühəndislik və İnformasiya Texnologiyaları sahələri.
Tələblər:
Təhsil: THE/QS reytinqlərində ilk 300-də yer alan universitetlərdən birində doktorantura təhsili almaq;
İş təcrübəsi: ən az 2 il xarici ölkədə tədqiqat təcrübəsi;
Vacib kvalifikasiyalar:
- Son 5 ildə ixtisasa uyğun Q1-Q3 jurnallarında birinci və ya ikinci müəllif olmaqla 10 məqaləyə sahib olmaq;
- Son 5 ildə ixtisasa uyğun Q1 jurnallarında ən azı 2 məqaləyə sahib olmaq;
- Son 5 ildə özünə istinad xaric Scopus və ya WoS profil H indeksi 10 olmaq;
- Son 5 ildə ən az 3 ölkənin tədqiqatçıları ilə birgə məqalə dərc etmək;
- Son 5 ildə ən az 1 beynəlxalq tədqiqat qrantında (məsələn, Horizon Eurpoe, NSF, ERC) iştirakçı olmaqdır.
