Bu gün İlaxır çərşənbədir. Novruz bayramına bir neçə gün qalıb. Bayram süfrəsi açmaq üçün insanlar indidən bazarlara üz tutur, bayrama yaxın qiymətlərin artacağından narahat olduqlarından öncədən alış-verişə başlayırlar.
Bəs, görəsən, hansı məhsulların qiymətində artım müşahidə olunur?
Mövzu ilə bağlı Bakuplus.az-a açıqlama verən iqtisadçı-ekspert Fuad İbrahimovun sözlərinə görə, ümumiyyətlə bayrama az müddət qalmış bayram süfrəsində istifadə olunan istənilən ərzaqlara hər zaman tələbat artır:
“Tələbat da artdıqda qiymətlər qalxır. Bundan da çox məharətlə ticarət şəbəkə iştirakçıları istifadə edirlər. Əvvəllər də bu belə olub. Belə də davam edir. Hər bir insanın bayrama yanaşması fərqlidir. Elə adam var, sadə yanaşır, sadə süfrə aça bilər. Elə ola bilər ki, gəliri azdır, süfrəsini bol edər. Konkret məbləğ demək mümkün deyil. Ümumilikdə qeyd edə bilərik ki, qiymətlər bahalaşıb. Əhalinin əksər hissəsinin gəliri bunu qarşılaya bilmir”.
İqtisadçı Asif İbrahimli qeyd edib ki, Azərbaycan xalqının ən önəmli bayramlarından biri də İlaxır çərşənbədir:
“Novruz bayramı ərəfəsində insanlar xüsusilə yaxınları və doğmaları ilə bayramı keçirtmək istəyirlər. Xərcin daha çox çıxdığı bayramlardandır. Qonaq gedib-gəlirlər. Yaxınlarını ziyarət etdikləri zaman da hazırladıqları şirniyyatları pay olaraq aparırlar. Ona görə də bayram bazarlığına xüsusi önəm verirlər. İnsanlar sıxlığa düşməmək üçün bayram bazarlıqlarını öncədən edirlər”.
A.İbrahimli əlavə edib ki, iqtisadiyyatda tələb hər zaman təklifi formalaşdırır:
“Xüsusilə də bayram aylarında un, şəkər və s. ərzaq məhsullarına, xüsusilə də çərəzlərə tələbat artdığı üçün bahalaşma müşahidə olunur. Hər il olduğu kimi bu il də bu mənzərəni görürük.
Düşünürəm ki, ötən ilki ilə müqayisədə bir ailənin bayram süfrəsini hazırlamasına xərcləyəcəyi məbləğ iki dəfəyə qədər artıb. Hazırda inflyasiya həddi cüt rəqəmli inflyasiya indeksindədir”.
Nəzrin Vahid
