Bakı Ağır Cinayətlər Məhkəməsində bibisi qızını bıçaqlamaqda, digər qohumunu isə qətlə yetirməkdə təqsirləndirilən Kamal Baxşıyevin cinayəti işinin bəzi detalları məlum olub.
Hakim Nigar İmanovanın sədrliyi ilə keçirilən prosesdə ittiham aktı elan olunub.
İttiham aktına əsasən, təqsirləndirilən şəxs bibisi qızı, zərərçəkmiş Səlimovanın yaşadığı evin müşahidə kameralarına düşmüş videogörüntüləri əldə etdikdən sonra onun Elşad Baxışovla sevgi münasibətində olduğuna və həyat yoldaşına xəyanət etdiyinə inanıb.
Həmin videogörüntülər Səlimovanın həyat yoldaşı tərəfindən qohumlarına təqdim edilib. Kamal isə bunu namusuna toxunan hərəkət kimi qiymətləndirərək həm Elşaddan, həm də bibisi qızından qisas almaq qərarına gəlib.
Məhkəmə tərəfindən müəyyən olunub ki, təqsirləndirilən şəxs əvvəlcə Elşadı izləyərək onun hərəkətlərini nəzarətdə saxlayıb.
2026-ci ilin aprelin 4-ü gecə saatlarında Kamal idarə etdiyi avtomobillə Suraxanı rayonu, Zığ qəsəbəsi ərazisində Elşada yaxınlaşıb, söhbət etmək bəhanəsi ilə onu avtomobilə dəvət edib. Elşad ön sərnişin oturacağında əyləşdikdən sonra təqsirləndirilən şəxs üzərində gəzdirdiyi bıçağı çıxararaq qəfil hücuma keçib. O, Elşadın həyat üçün vacib orqanlarının yerləşdiyi nahiyələrə ardıcıl və güclü bıçaq zərbələri endirib. Güclü daxili qanaxma nəticəsində Elşad hadisə yerində həyatını itirib.
Elşadı öldürdükdən təxminən yarım saat sonra təqsirləndirilən şəxs bibisi qızı N.Səlimovanın yaşadığı ünvana gedib. O, heç nə olmamış kimi qadınla söhbət etmək istədiyini bildirib və onu evdən çıxarıb avtomobilinə mindirib. Kamil N.Səlimovanı yaşayış məntəqəsindən uzaq, insanların kömək göstərə bilməyəcəyi qaranlıq əraziyə aparıb. Ətrafda heç kimin olmadığına əmin olduqdan sonra avtomobildə əyləşmiş bibisi qızına qəfil hücum edərək onu da öldürmək məqsədilə eyni bıçaqla ardıcıl zərbələr endirib.
Ekspertiza ilə müəyyən olunub ki, zərərçəkmiş ümumilikdə 35 bıçaq xəsarəti alıb. İttihamda qeyd edilib ki, təqsirləndirilən şəxs cinayət niyyətini başa çatdıra bilməyib.
Zərərçəkmiş qadının aktiv müqavimət göstərməsi, hadisə yerinə yaxınlarının gəlib müdaxilə etməsi və onun təcili şəkildə xəstəxanaya çatdırılaraq ixtisaslı tibbi yardım alması nəticəsində həyatı xilas edilib.
Məhkəmənin hökmü ilə Kamil Baxşıyev cəzasını ciddi rejimli cəzaçəkmə müəssisəsində çəkməklə 13 il müddətinə azadlıqdan məhrum edilib.
