Binəqədi rayonunda şagirdlər məktəbə getmək üçün hər gün qəbiristanlıq ərazisindən keçirlər. Bu haqda bu gün, 23 sentyabr tarixində Bakuplus.az ATV-yə istinadən xəbər verir.
Biləcəri qəsəbəsi, Nur massivi adlanan ərazidə yerləşən 314 saylı tam orta məktəbə gedən yol hasarlanıb. 100-lərlə şagirdin alternativ yolu olmadığından məzarlığın içi ilə təhsil ocağına gedib-gəlməli olurlar.
Valideynlər iddia edirlər ki, illərdir məktəb yolu kimi istifadə etdikləri dalan xəbərdarlıq edilmədən yaxınlıqda yaşayan sakinlər tərəfindən hasara alınıb. Bir neçə dəfə həmin hasar uçurulsa da, dalan yenidən hasara alınıb. Məktəbə qəbiristanlığın içi ilə keçib gedən şagirdlər dərsə vaxtında çata bilmirlər.
Dəfələrlə aidiyyəti qurumlara müraciət edən valideynlər hələ də heç bir nəticə əldə etməyiblər. Lakin Biləcəri qəsəbə Bələdiyyəsindən bildirilib ki, onlara hər hansı müraciət daxil olmayıb.
“Yerində tam araşdırma aparacağıq. Əgər yerində qanunazid məsələlər varsa, aidiyyəti qurumlara müraciət olunacaq. Tərəfimizdən lazımi tədbirlər görüləcək”, – bələdiyyə sədri Ehtibar Cabbarov qeyd edib.
