Bakının Biləcəri dəmir yolu stansiyası ərazisində yerləşən piyada keçidi acınacaqlı vəziyyətdədir.
Bakuplus.az-a daxil olan şikayətlərdə bildirilir ki, stansiyanın üzərindəki körpü uzun illərdir əsaslı təmir olunmayıb və hazırda istifadə üçün demək olar ki, yararsız hala düşüb. Sakinlərin sözlərinə görə, keçiddə pilləkənlər köhnəlib, səthi sürüşkəndir və xüsusilə yağışlı havalarda təhlükə daha da artır.
Ən ciddi problem isə əlilliyi olan şəxslər, yaşlı insanlar və uşaq arabası ilə hərəkət edən valideynlər üçün şəraitin olmamasıdır. Onlar körpüdən istifadə edərkən ciddi çətinliklərlə üzləşir, bəzi hallarda isə keçiddən ümumiyyətlə istifadə edə bilmirlər.
Şikayətçilər bildirir ki, bu ərazi gün ərzində minlərlə insanın istifadə etdiyi əsas keçidlərdən biridir. Buna baxmayaraq, dəfələrlə edilən müraciətlərə cavab olaraq heç bir əsaslı tədbir görülməyib.
