Bakıdakı gözəllik salonunda arvadını qətlə yetirən İsrafil Yusifovun cinayət işi üzrə məhkəmə başlayır. Bu haqda bu gün, 1 avqust tarixində Bakuplus.az Report-a istinadən məlumat verir.
Cinayət işinə Bakı Ağır Cinayətlər Məhkəməsinin hakimi Leyla Məmmədova tərəfindən baxılacaq. Məhkəmənin hazırlıq iclasının vaxtı hələ məlum deyil.
Hadisə cari ilin aprelində paytaxtın Binəqədi rayonunda yerləşən gözəllik salonlarının birində qeydə alınıb. 43 yaşlı Yusifovun şəxsi münasibətlər zəminində aralarında yaranmış mübahisə zamanı arvadı, 37 yaşlı Aygün Yusifovanı bıçaqlayaraq öldürməsinə əsaslı şübhələr müəyyən edilib. Onların iki övladı – bir oğlan və bir qızı var. Bildirilir ki, qadın onun xalası qızı olub.
Hadisədən sonra Yusifov bölməyə gələrək polisə təslim olub.
Ona qarşı Cinayət Məcəlləsinin 120.2.4-cü (xüsusi amansızlıqla qəsdən adamı öldürmə) maddəsi ilə ittiham irəli sürülüb.
