Binəqədidə baş vermiş partlayışla bağlı həbs olunanlar var. Bu haqda bu gün, 31 yanvar tarixində Bakuplus.az Baş Prokurorluğa istinadən xəbər verir.
“Bakı Ağac Emalı” Açıq Səhmdar Cəmiyyətinin səhmdarı və müəssisəyə faktiki sahiblik edən vəzifəli şəxs Tağı İbrahimov və ASC-ni faktiki olaraq idarə edən Toğrul Rzayev həbs olunublar.
Onlar müəssisədə yanğın təhlükəsizliyi qaydalarına riayət etməməkdə, yanğın təhlükəsizliyi ilə bağlı əvvəllər aşkar edilmiş ciddi qanun pozuntularını aradan qaldırmamaqda, eləcə də yanar tullantıların və tozların təmizlənməsini təmin etməməkdə ittiham olunurlar.
Araşdırma zamanı məlum olub ki, partlayış taxta materialların emalı zamanı yaranmış taxta tozunun və kimyəvi tərkibli materialların buxar qarışığının təmizlənməməsi səbəbindən baş verib.
Tağı İbrahimov ATV kanalının keçmiş prezidenti, Diasporla İş üzrə Dövlət Komitəsinin sabiq sədri Nazim İbrahimovun qardaşıdır.
Cari ilin 15 yanvar tarixində Binəqədi rayonunda mebel sexində partlayış baş verib. Nəticədə 10 nəfər ölüb, 23 nəfər xəsarət alıb.
