Binəqədi rayonu, Mirmahmud Kazımovski, 54/56 ünvanında yaşayan 850 sakinin həyatı təhlükə altındadır. Bununla bağlı bir qrup vətəndaş ictimaiyyətə müraciət edib. Bu haqda bu gün, 29 sentyabr tarixində Bakuplus.az Qafqazinfo-ya istinadən məlumat verir.
“Yaşadığımız bina 2015-ci ildə tikilib təhvil verilsə də, 8 ildən artıqdır ki, tikintini həyata keçirən “Zaman” Elmi-İstehsalat Müəssisəsindən (EİM) onu təhvil ala bilmirik. Həyətimizdə sakinlərin ümumi mülkiyyətinə verilməli olan ofis qanunsuz yollarla şirkət tərəfindən ələ keçirilib. Bütün binanı içməli su ilə təmin edən anbarın üzərində yerləşən ofisin təyinatı dəyişdirilərək yaşayış obyekti edilib, anbara giriş və havalandırma sistemi bağlanıb”, – deyə sakinlər bildiriblər.
Nasosxana və su anbarı üzərində tikilən ofisin orada qanunsuz olduğu deyilir.
Məsələ ilə bağlı sakinlər Fövqəladə Hallar Nazirliyinə (FHN) müraciət ediblər.
FHN-in Tikintidə Təhlüksizliyə Nəzarət Dövlət Agentliyinin əməkdaşları əraziyə baxış keçirərək sakinlərin dediyi nöqsanları təsdiqləyiblər. Aidiyyəti qurumlara problemin həlli ilə bağlı məktub göndərilsə də, hələ də heç bir tədbir görülməyib.
Sakinlər onu da qeyd ediblər ki, tikinti şirkəti 3 ildir ki, binanı qeydiyyatdan keçirdikləri cəmiyyətə təhvil verməkdən imtina edir: “2021-ci ildən “Binəqədi-28” Mənzil Mülkiyyətçiləri Müştərək Cəmiyyətini (MMMC) təsis etmişik. Ədliyyə Nazirliyində qeydiyyatdan keçdik, vergi orqanında qeydiyyata durduq və qanuni şəkildə fəaliyyət göstəririk. Amma “Zaman” EİM bizə daima maneə törədir, fəaliyyət göstərməyə imkan vermir. Prezidentin Sərəncamı da var ki, çoxmərtəbəli yaşayış binası tikilib təhvil verildikdən sonra 1 ay ərzində MTK sakinlərə təhvil verib çıxmalıdır. Lakin “Zaman” rəhbərliyi qanunları saymır. Rəhbərlik tərəfindən bizə deyilir ki, bizə verilən sənədi qəbul etmirlər. Müxtəlif bəhanələrlə təhvil verməkdən imtina edilər”.
Sakinlər hazırda 1 saylı Bakı İnzibati İqtisad Məhkəməsinə müraciət etdiklərini deyirlər.
“Zaman” EİM-in rəhbəri Elşən Aslanovun sözlərinə görə, sakinlərin iddiaları əsassızdır və burada tikilən bütün obyektlərin müvafiq sənədi var. Binanın niyə sakinlərə təhvil verilməməsinə gəlincə isə E.Aslanov bildirdi ki, “Binəqədi-28” MMMC-nin nümayəndələri özləri binanı təhvil almırlar və prosesi uzadırlar.
FHN-dən bildirildi ki, sözügedən problem məhkəmə orqanları tərəfindən araşdırılır: “Hazırda “Zaman” EİM rəhbərliyi ilə "Binəqədi-28" MMMC arasındakı mübahisəli məsələyə məhkəmə orqanları tərəfindən baxılır”.
Saxta sənəd ittihamları ilə bağlı 1 saylı Bakı İnzibati İqtisadi Məhkəməsindən bildirildi ki, həmin iş icraatdadır və məhkəmə araşdırması davam edir.
