“Bizim binamız dövlət tərəfindən qorunur. Necə olur ki, özünü təqdim etməyən şəxslər gəlib yaşadığımız evə zərər yetirirlər?!”
Bunu Qafqazinfo.az-a Səbail rayonunda yerli əhəmiyyətli memarlıq abidəsi statusunu daşıyan binada yaşayan sakinlər deyiblər.
Vətəndaşların sözlərinə görə, çıxarışda sözügedən binanın ünvanı Əbdülkərim Əlizadə 3 olaraq göstərilib. Məhz həmin binada sakinlərin tanımadıqları şəxslər tərəfindən söküntü işləri aparılır: “Bu bina qorunur, mümkün deyil ki, söküntü işi görülsün. İnsanlar işdə olduğu zaman gəlib qapının domofonunu qıraraq binanın aşağısını pis vəziyyətə salıblar. Lakin bu işlərin kim tərəfindən və hansı əsasla həyata keçirildiyini öyrənmək istədikdə məlumat vermirlər. Məcbur qalıb öz vəsaitimizlə zədələnmiş hissələri bərpa etdik, çünki bu halda yaşamaq mümkün deyil”.
Şikayətçilər, həmçinin əlavə edib ki, onların etdiyi bərpadan sonra eyni hal baş verib: “Təəssüf ki, aprelin 24-də yenidən həmin şəxslər arakəsməni sökməyə cəhd etdilər, lakin biz sakinlər buna imkan vermədik. Biz işə getdikdən sonra isə onlar fürsətdən istifadə edərək bir daha arakəsməni dağıdıblar. Bununla bağlı sakinlərlə birgə müvafiq qurumlara müraciət etmişik. Baş verənlər bizim təhlükəsizliyimiz və əmlakımızın toxunulmazlığı ilə bağlı ciddi narahatlıq doğurur. Heç bir məlumat və nəzarət olmadan belə halların baş verməsi yanğın, subasma və digər fövqəladə hadisələrin riskini artırır. Qeyd etmək istəyirik ki, təxminən 20 il əvvəl də burada bənzər hadisələr baş verib”.
Sakinlərin iddiası ilə bağlı Səbail Rayon İcra Hakimiyyətindən bildirilib ki, məsələ araşdırılıb: "Araşdırma zamanı məlum olub ki, uzun illər öncə Səbail rayonu, Əbdülkərim Əlizadə küçəsi 3 ünvanında ümumi istifadədə olan pilləkən qəfəsinin zəbt olunmuş alt hissəsi sahibkar tərəfindən əvvəlki vəziyyətinə bərpa edilib”.
Məsələ ilə bağlı Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətindən bildirilib ki, Bakı şəhər Səbail rayonu, Məhəmməd Əmin Rəsulzadə küçəsi 6 ünvanında yerləşən 3229 inventar nömrəli yerli əhəmiyyətli tarix-memarlıq abidəsinə müdaxilə olunduğu aşkar edilib: “Dövlət Xidmətinin Bakı Regional İdarəsinin əməkdaşları tərəfindən abidəyə baxış keçirilən zaman tarixi tikilinin üçüncü mərtəbəsində yerləşən qeyri-yaşayış sahəsində qanunsuz söküntü, təmir işlərinin aparıldığı müəyyən edilib. Aparılan icazəsiz təmir işləri sakinlərin də narazılığına səbəb olub. Aşkar edilən faktla bağlı aidiyyəti dövlət orqanlarına müraciət edilib. Qeyd edək ki, “Tarix və mədəniyyət abidələrinin qorunması haqqında” Azərbaycan Respublikası Qanununun əsasən, abidələrin bədii-estetik görkəminin dəyişdirilməsi, uçurulması və onlar üçün təhlükə yarada biləcək təmir, inşaat, təsərrüfat və digər işlərin aparılması qadağandır. Abidələrin üzərində bərpa, konservasiya, təmir və digər işlər onların layihələri Dövlət Xidməti tərəfindən təsdiq edildikdən sonra aparılmalıdır”.
Xidmətdən o da bildirilib ki, abidələrin qorunması haqqında qanunvericiliyin pozulması cinayət, inzibati, intizam və mülki məsuliyyət yaradır.
