22 dekabr məşhur yazıçı, ssenarist və rejissor Həsən Seyidbəylinin doğum günüdür.
O, 1920-ci ildə Bakıda anadan olub. 132 saylı şəhər orta məktəbini bitirib. 1938–1939-cu illərdə Leninqrad Kino Mühəndisləri İnstitutunda, 1943–1951-ci illərdə Moskvada Ümumittifaq Dövlət Kinematoqrafiya İnstitutunun kinorejissorluq fakültəsində təhsil alıb. "Azərbaycanfilm" kinostudiyasında kinorejissor, 1963–1980-ci illərdə Azərbaycan Kinematoqrafçılar İttifaqının katibi və sədri vəzifəsində işləyib, "İmtahan", "Qızıl axtaranlar", "Bağlı qapılar" adlı dram əsərləri Azərbaycanda və xaricdə səhnəyə qoyulub. "Kür sahillərində", "Bizim Astrada", "Telefonçu qız" povestləri, "Cəbhədən-cəbhəyə", "İllər keçir" (İ.Qasımovla birgə), "Tərsanə", "Çiçək" romanları, "Dəniz cəsurları sevir" , "Sən nə üçün yaşayırsan" (1959, hər ikisi İ.Qasımovla birgə) pyesləri insanların əməyindən, mənəvi-əxlaqi saflığından bəhs edir. "Uzaq sahillərdə" (1954, İ.Qasımovla birgə) romanı Sovet İttifaqı Qəhrəmanı Mehdi Hüseynzadəyə həsr olunub. 1969-cu ildə Həsən Seyidbəyli tərəfindən ekranlaşdırılan "Bizim Cəbiş müəllim" tammetrajlı bədii filminə bu gün də milyonlarla tamaşaçı həvəslə, sevərək baxır. Əsərləri bir sıra xarici dillərə tərcümə edilib.
Həsən Seyidbəyli 1963–1980-ci illərdə Azərbaycan Kinematoqrafçılar İttifaqı İdarə Heyətinin I katibi olub.
Filmləri Ümumittifaq Kino festivallarında mükafat və diplomlara layiq görülüb.
Film Fondunda rejissor Həsən Seyidbəylinin şəxsi arxivi yaradılıb.
Həsən Seyidbəyli 1980-ci ildə vəfat edib.
