Paytaxtın Xətai rayonunda yerləşən “Bravo” hipermarketində silahlı insidentlə bağlı daha bir neçə nəfər tutulub. Bu haqda bu gün, 9 mart tarixində Bakuplus.az Baş Prokurorluğa istinadən xəbər verir.
Keçirilən əməliyyatlar zamanı Ruhlan İsmayılov hüquq-mühafizə orqanlarının əməkdaşlarına müqavimət göstərdiyi üçün zərərsizləşdirilib. Dəyanət Qudrətov, Azər Məmmədov və Səbuhi Qurbanov şübhəli şəxs qismində saxlanılıblar.
R.İsmayılovun zərərsizləşdirildiyi mənzildə 16.835 AZN, 20.100 ABŞ dolları, eləcə də “AKS Lancaster-03” markalı odlu silah, 1 ədəd “Makarov” və 1 ədəd “Colt” tipli tapançalar, həmçinin çoxsaylı döyüş sursatları aşkar edilib. D.Qudrətovun üzərində isə 1 ədəd “Blow TR 92D” modelli tapança aşkar edilib.
Faktlarla bağlı bir neçə maddə ilə cinayət işi açılıb. Araşdırmalar davam edir.
4 mart 2023-cü il tarixində "Bravo" hipermarketinin Əhmədli filialında inkassatorlara silahlı hücum olmuşdur. Nəticədə 1 nəfər yaralanmış 1 nəfər isə həlak olmuşdur.
