Vüqar Qasım oğlu Həşimov 1986-cı ildə Bakı şəhərində anadan olub.
O, 6 yaşından atasının köməyi ilə şahmatla məşğul olmağa başlayıb. Kiçik yaşlarında 3 dəfə ölkə, 4 dəfə Avropa qalibi olub. Həşimov 1998-ci ildə dünyada şahmat üzrə ən gənc beynəlxalq usta olub. Lakin o, beynindən bir neçə dəfə əməliyyat keçirdiyindən bir müddət şahmatı atmaq məcburiyyətində qalıb. Müalicəni bitirdikdən sonra Vüqar 2005-ci ildə yenidən şahmat oyunlarına qayıdıb.
Vüqar Həşimov 2006-cı ildə Birləşmiş Ərəb Əmirliklərində Əbu-Dabi şəhərində keçirilən oyunda 19 qrosmeysteri geridə qoyaraq, heyəti ilə birgə yarışda qalib gəlib. Sonralar o, Xorvatiya, Türkiyə, Rumıniya, İspaniya kimi klubların heyətində çempion olub. 2008-ci ilin fevralında Həşimov Fransada təşkil olunan “Cappelle Grande” turnirində qalib gəlib. 2008-ci ilin aprelində o, Bakıda şahmat tarixində ilk FİDE Qran-prisində qələbə qazana bilib. Bir müddət sonra Vüqar Həşimovun reytinqi 2750 göstəricisini keçib və o, şahmat elitasının siyahısında 10-luğa daxil olmağı bacarıb.
Serbiyanın Novi-Sad şəhərində 2009-cu ildə keçirilən komanda üzrə Avropa çempionatında Azərbaycan millisinin ilk qələbəsi Vüqar Həşimovun sayəsində baş tutub. 2011-ci ildə Vüqar yenidən Azərbaycan millisinin tərkibində Yunanıstanda təşkil olunan Avropa çempionatında iştirak edib. Fransaya qarşı oyun zamanı Vüqarın təzyiqi qəfil qalxıb və o, oyunu davam etdirə bilməyib. Komandalar arasında ikitərəfli razılığa əsasən, görüşdə heç-heçə qeydə alınıb. Lakin Vüqar turniri başa vurmağa özündə güc taparaq, iki dəfə qalib gəlib. Nəticədə komanda həmin turnirdə gümüş medal qazanıb.
Həşimovun son turniri 2012-ci ildə Hollandiyanın Veyk-an-Zeed şəhərində baş tutub. Bu turnirdən sonra o, yarışlarda iştirakını dayandırıb və müalicəsini davam etdirməyə başlayıb.
Vüqar Həşimov 11 yanvar 2014-cü ildə beynində bədxassəli şişə (xərçəng) görə müalicə aldığı Almaniyanın Heydelberq şəhər klinikasında vəfat edib. O, Vətəninə gətirilərək Bakıdakı Üçüncü Fəxri xiyabanda dəfn olunub.
2016-cı ildən Vüqar Həşimovun adını daşıyan Şahmat akademiyası fəaliyyət göstərir.
