1945-ci il mayın 8-dən 9-na keçən gecə alman generalı Vilhelm Keytel qeyd-şərtsiz təslim aktını imzalamışdır. Həmin gündən sonra hər il 9 may Qələbə Günü kimi qeyd olunur.
Bakı bu qələbədə böyük rol oynayıb.
22 iyun 1941-ci ildə alman qoşunlarının SSRİ-yə hücumu başlayıb. 1942-ci ilin avqust ayında faşist ordusu Şimali Qafqazda Terek çayının sahillərinə çıxıb, ancaq irəliləyə billməyib. Buna baxmayaraq, düşmən 1942-ci ildə 71, 1943-cü ildə isə 3 dəfə Bakı səmasına daxil olmağa cəhd göstərib, lakin təyyarəçilərin və zenitçilərin sayəsində faşistlərin 96 təyyarəsi məhv edilib.
O zamanlar sovet ordusunun yanacağa olan tələbatının 70%-ni Bakı nefti ödəyirdi. Bakının neft müəssisələrində istehsal olunan 22 milyon tondan çox benzin, sürtkü yağları və digər neft məhsulları cəbhəyə göndərildi ki, bu da döyüş təyyarələri üçün istifadə olunan benzinin 85-90%-ni təşkil edirdi.
Bakı zavodları 130 növ müxtəlif silah və hərbi sursat – minomyotlar, tank əleyhinə minalar, qumbaralar, təyyarə, tanklar üçün detallar və s. istehsal etməklə ön cəbhəyə işləyirdi. Elektrik enerjisi ilə təchizatına görə şəhər SSRİ-də 3-cü yeri tuturdu.
