SSRİ Xalq artisti Müslüm Məhəmməd oğlu Maqomayev 17 avqust 1942-ci ildə Bakıda anadan olub. O, Bakı Konservatoriyasının musiqi məktəbində (indiki Bülbül adına Musiqi Məktəbi) fortepiano və bəstəkarlıq ixtisası üzrə təhsil almış, Asəf Zeynallı adına Bakı Musiqi Kollecində təhsilini davam etdirmişdir.
M.Maqomayev ilk uğurunu 19 yaşında Helsinkidə VIII Ümumdünya Festivalında qazanmış və orada medalla təltif olunmuşdur. Həmin dövrün məşhur “Oqonyok” jurnalı onun portretini və “Bakılı gənc dünyanı fəth edir” başlıqlı məqaləni dərc etmişdir. Müğənninin repertuarına 600-dək əsər daxildir.
Bir vaxtlar Müslüm Maqomayevin xaricdə opera müğənnisi kimi karyera qurmaq imkanı var idi: ona İtaliyanın məşhur “Teatro alla Scala” və Moskvanın “Bolşoy Teatr”ında işləmək təklifi edilmişdir. Lakin o, bu təklifləri qəbul etməmişdir.
Maqomayev SSRİ “Qırmızı Əmək Bayrağı” və “Xalqlar Dostluğu” ordenləri ilə təltif edilib, SSRİ-nin Xalq artisti adına layiq görülüb. O, həmçinin Azərbaycan Respublikasının “Şöhrət” və “İstiqlal” ordenləri ilə təltif edilib.
Ötən ilin bu günü Bakı bulvarında dünyaşöhrətli müğənninin abidəsi ucaldılıb.
