Albert Aqarunoviç Aqarunov 25 aprel 1969-cu ildə Bakının Əmircan qəsəbəsində yəhudi ailəsində anadan olub. O, Suraxanı rayonundakı 154 saylı orta məktəbin səkkizinci sinfini bitirib, peşə məktəbinə sürücü-mexanik ixtisasına daxil olub.
Aqarunov Gürcüstanda hərbi xidmətə başlayıb və xidməti dövründə tank komandiri olub. Sonra o, Suraxanıda maşınqayırma zavodunda çalışıb.
Qarabağ müharibəsi başlayarkən Albert könüllü cəbhəyə yollanır. Bundan sonra o, tank komandiri təyin edilir və Şuşa cəbhəsinə göndərilir. Tankçı Xankəndi, Daşaltı, Cəmilli istiqamətlərində döyüşüb.
Düşmənin 2 tankı bir-birinə yaxınlaşan zaman Aqarunov bir mərmi ilə 2 tankı vurub. Buna görə bu metod döyüş yoldaşları tərəfindən “yəhudi buterbrodu” adını alıb. Ermənilər Albertin başına 5 milyon rubl pul mükafatı qoymuşdular.
Albert Aqarunov 8 may 1992-ci ildə Şuşa uğrunda gedən döyüşlərdə snayper gülləsinə tuş gəlib və həlak olub. O, Bakıda Şəhidlər xiyabanında dəfn edilib.
