Bu gündən Azərbaycanda nəqliyyat vasitələrinin parklanmasına görə ödəniş nağdsız qaydada həyata keçiriləcək. Bu haqda bu gün, 7 avqust tarixində Bakuplus.az Azərbaycan Yerüstü Nəqliyyat Agentliyinə (AYNA) istinadən məlumat verir.
Ödəniş AYNA tərəfindən hazırlanmış “AzParking” tətbiqi vasitəsilə həyata keçirilə bilər.
Parkinq haqqını “AzParking” tətbiqinin “Ödənişlər” bölməsi vasitəsilə ödəmək mümkündür. Profil bölməsində şəxsi məlumatlar, avtomobillər, bank kartları, ödənişlər və fərdi parkinq biletləri haqqında məlumatlar yer alıb. “AzParking”ə istənilən sayda avtomobil əlavə edə bilərsiniz.
Tətbiqin “Fərdi parklanma talonu” bölməsi vasitəsilə avtomobillərin parkinq yerlərinin təşkil olunduğu yol kənarlarında yerləşən ev və ya binalarda yaşayan avtomobil istifadəçiləri pulsuz parkinq üçün müraciət edə bilərlər. Bunun üçün avtomobil sahibi müvafiq məlumatları dolduraraq ərizə təqdim etməlidir.
Mobil tətbiqi həm App Store, həm də Google Play Store-dan yükləmək olar.
