Bakı kəndləri əsrlərin yaddaşını özündə yaşadan qədim yaşayış məntəqələridir. Abşeronun qədim kəndlərindən olan Bülbülə də zəngin tarixi və memarlıq irsi ilə seçilir.
Kənddə bu günədək qorunub saxlanılan tarixi tikililərdən biri də Əlican və Vəlican hamamıdır.
Mənbələrə görə, vaxtilə Bülbülədə dörd hamam – Əlican və Vəlican, Hacı İsgəndər, Razaq və Almas hamamları fəaliyyət göstərib. Onlardan Əlican və Vəlican hamamının 1902-ci ildə Məşədi Vəlican tərəfindən tikdirildiyi qeyd olunur.
XX əsrin əvvəllərində inşa edilən hamam yalnız insanların yuyunmaq üçün istifadə etdiyi məkan olmayıb. Həmin dövrdə hamamlar kənd sakinlərinin görüşdüyü, söhbətləşdiyi və xəbərləşdiyi ictimai məkanlardan biri kimi də mühüm rol oynayıb.
Tikilinin diqqətçəkən xüsusiyyətlərindən biri günbəzli quruluşudur. Məlumatlara əsasən, hamamın əvvəlcə dörd günbəzi olub. Hazırda isə onlardan yalnız ikisi qorunub saxlanılıb.
Zamanın təsirinə baxmayaraq, hamamın qalan hissələri Bülbülənin tarixi simasını əks etdirən mühüm nümunələrdən biri olaraq qalır.
Əlican və Vəlican hamamı tarixi-arxitektura abidəsi kimi də qeyd olunur. Abidənin qorunması yalnız qədim bir tikilinin saxlanılması deyil, həm də Bülbülənin məişət və mədəniyyət tarixinin gələcək nəsillərə çatdırılması baxımından əhəmiyyətlidir.
Bu gün səssizliyə qərq olan hamam bir vaxtlar insanların gəliş-gedişi və söhbətləri ilə canlanan məkan olub. Onun divarları və günbəzləri isə Bülbülənin keçmişindən xəbər verən səssiz yaddaş kimi bu günədək yaşayır.
Fotolar: Amirə Suleyman
