1 iyundan etibarən “Buta Airways” yay cədvəli çərçivəsində Bakı-Batumi-Bakı marşrutu üzrə xüsusi uçuşlar həyata keçirməyə başlayacaq. Bu haqda bu gün, 28 mart tarixində şirkətin mətbuat xidməti məlumat verib.
Reyslər həftədə iki dəfə - cümə və bazar günləri həyata keçiriləcək.
Uçuşlara biletləri aviadaşıyıcının rəsmi saytında (Büdcə, Standart və Super tariflər), eləcə də akkreditə olunmuş aviaşirkət agentliklərində əldə etmək olar (yalnız Super tarif). Biletlərin qiyməti 29 avrodan başlayır.
Pandemiya dövründə reyslər Heydər Əliyev Beynəlxalq Aeroportunun 1 saylı terminalında həm gediş, həm də eniş üçün yerinə yetirilir.
Mövcud epidemioloji məhdudiyyətlər altında uçuşa icazə verilən kateqoriyadan olan sərnişinlər daşınmağa qəbul ediləcək. Gürcüstana səfər etməyi planlaşdıran Azərbaycan vətəndaşlarının bu ölkənin ərazisinə daxil olmaq hüququ olmalıdır.
Pandemiya zamanı Gürcüstana giriş qaydaları ilə aviaşirkətin saytında, https://www.butaairways.az/az/covid/georgia keçidində tanış olmaq olar.
Həmçinin, koronavirus pandemiyası ilə əlaqədar tətbiq edilən Azərbaycan ərazisinə giriş qaydaları ilə https://www.butaairways.az/ru/covid/azerbaijan keçidində tanış olmaq olar.
